GANGILONGA

GANGILONGA
GANGILONGA

USISAHAU


Saturday, September 16, 2017

SERIKALI KUKABILIANA NA VIWAVI JESHI



 Kiwavijeshi aina ya Fall Armyworm (FAW)
Mkurugenzi Msaidizi wa Idara ya Maendeleo ya Mazao Wizara ya Kilimo Mifugo na Uvuvi, Bwana Beatus Malema akizungumza wakati akifungua warsha ya siku moja kujadili namna ya kukabiliana na mdudu aina ya Kiwavijeshi
Kaimu Mkurugenzi Msaidizi Afya ya Mimea, Idara ya Maendeleo ya Mazao katika Wizara ya Kilimo Mifugo na Uvuvi, Bibi Beatrice Palangyo akiwasilisha mada ya utambuzi wa Viwavijeshi wapya aina ya Fall Armyworm (FAW) wanaojulikana kitaalamu kama Spodoptera Frugiperda wakati wa warsha ya kujenga uelewa juu ya wadudu hao



Viwavijeshi wapya aina ya Fall Armyworm (FAW) wakishambulia mazao aina ya mahindi
Wadau wa kilimo kutoka Shirika la Maendeleo la Watu wa Marekani Wizara ya Kilimo Mifugo na Uvuvi, USAD, ONE HACKER FUND, Taasisi ya Utafiti wa Viuatilifu Ukanda wa Kitropiki  (TPRI), Shirika la Chakula na Kilimo la Umoja wa Mataifa (FAO), na Mradi wa WEMA wakimsikiliza Mkurugenzi Msaidizi wa Idara ya Maendeleo ya Mazao Wizara ya Kilimo Mifugo na Uvuvi, Bwana Beatus Malema akizungumza wakati akifungua warsha ya siku moja kujadili namna ya kukabiliana na mdudu aina ya Kiwavijeshi
 Baadhi ya wadau wa kilimo wakifatilia warsha
Viwavijeshi wapya aina ya Fall Armyworm (FAW) wakishambulia zao la Mahindi
 
Na Mathias Canal, Dar es salaam 

Wizara ya Kilimo Mifugo na Uvuvi imeanza jitihada za kuwakabili Viwavijeshi wapya aina ya Fall Armyworm (FAW) wanaojulikana kitaalamu kama Spodoptera Frugiperda ambao wametajwa kuwa na uwezo mkubwa kuharibu mazao mbalimbali hususan mahindi ambayo ndio zao kuu la chakula nchini.

Imeelezwa kuwa Viwavijeshi hao wanapofika kwenye mazao hutoa kemikali ambayo huweza kudanganya mmea kuwa unashambuliwa na magonjwa kama ukungu au fangasi hivyo mmea unapohisi unashambuliwa na hayo magonjwa, hupunguza kinga dhidi ya wadudu hao hatari na kuwa rahisi kushambuliwa. 

Hayo yamebainishwa leo Septemba 14, 2017 na Mkurugenzi Msaidizi wa Idara ya Maendeleo ya Mazao kutoka Wizara ya Kilimo Mifugo na Uvuvi, Bwana Beatus Malema wakati akifungua warsha ya siku moja mbele ya Wadau wa Kilimo ambao ni Shirika la Maendeleo la Watu wa Marekani USAD, ONE HACKER FUND, Taasisi ya Utafiti wa Viuatilifu Ukanda wa Kitropiki  (TPRI), Shirika la Chakula na Kilimo la Umoja wa Mataifa (FAO), na Mradi wa WEMA .

Mkutano ulikuwa na lengo la kujenga uelewa wa pamoja kwa ajili ya kumkabili mdudu huyo aina ya Fall Armyworm (FAW) ambaye anashambulia mazao mbalimbali nchini hususani zao la mahindi.

Alisema Athari ya viwavi jeshi haishii kuharibu majani ya mimea pekee, wadudu hao wanapokula majani na kutengeneza sumu aina ya ‘firenide’ inayodhuru mifugo inapokula majani yaliyoathiriwa.

Bwana Malema amesema tayari Serikali imechukua juhudi za awali kukabiliana na mdudu huyo ikiwa ni pamoja na kutoa elimu kwa wananchi juu ya utambuzi wa mdudu huyo kwa kuwataka Wananchi kung’oa mazao na kuyachoma pindi wanapobaini uwepo wa mdudu huyo.

Pia tayari dawa tatu zimepitishwa na Wizara ya Kilimo Mifugo na Uvuvi kupitia Taasisi ya uchunguzi wa Viatilifu (TPRI) zinazoangamiza wadudu hao ambazo ni Duduba 450, Mupacrone 500 EC na Match Save kutoka Kampuni ya Syngenta hivyo Wananchi wametakiwa kuzitumia haraka pindi wanapoona dalili za kuwepo wa wadudu hao shambani.

Bwana Malema amesema kuwa katika kipindi cha miaka mingi Tanzania imekuwa ikikumbwa na viwavijeshi aina ya African Armywarms ambapo mara zote imekuwa ikiwadhibiti wadudu hao wanapojitokeza kwa kuwapa kiuatilifu kinachosababaisha matumbo ya wadudu hao kujaa na hatimaye kuwasababishia vifo.

Ameongeza kuwa kwa mara ya kwanza Wizara ilipata taarifa ya uvamizi katika shamba la Mwekezaji mkubwa Wilayani Nkasi Mkoani Rukwa mwezi Machi 2017 na walipofuatilia na kupeleka sampuli maabara mdudu huyo alibainika kwa jina la  Spodoptera frugiperda au Fall arymworm ambaye ni hatari na amekuwa akiripotiwa katika maeneo mbalimbali duniani.

Kutokana na unyeti wa suala hilo Wizara ya Kilimo imewasiliana na  Shirika la Chakula Duniani (FAO), kwa ajili ya kuunganisha juhudi za pamoja ili kumdhibiti mdudu huyo kabla hajasambaa kwenye maeneo mengi nchini.

Shirika la Chakula na Kilimo la Umoja wa Mataifa (FAO) katika taarifa yake imesema viwavijeshi hao aina ya Fall armyworm wameonekama pia katika nchi za Zimbabwe, Malawi, Msumbiji, Namibia Afrika ya Kusini na Zambia huku chanzo chake ikiwa ni nchini Marekani.

Kwa mujibu wa Redio ya Umoja wa Mataifa, FAO bado haijatangaza   kiwango kamili cha uharibifu katika nchi hizo, huku ikiongeza kuwa Shirika hilo na Wadau wa Jumuiya ya Maendeleo ya Nchi za Kusini mwa Afrika (SADC) wamejadili  udhibiti wa viwavijeshi.

Naye Kaimu Mkurugenzi Msaidizi Afya ya Mimea, Idara ya Maendeleo ya Mazao katika Wizara ya Kilimo Mifugo na Uvuvi, Bibi Beatrice Palangyo akiwasilisha mada ya utambuzi wa wadudu hao katika warsha hiyo amesema kuwa katika Nchi za Kusini mwa Jangwa la Sahara wadudu hawa walianza kuingia nchini Nigeria na kwa sasa wameenea katika nchi mbalimbali ikiwemo Tanzania, Afrika kusini, Jamhuri ya Kidemokrasi ya Congo na Malawi.

Alisema wadudu hao wanashambulia mazao ya jamii ya nafaka kama mahindi (Corn) wanauwezo wa kushambulia hata magugu pale wanapokosa mazao kama mahindi kwani hawali mazao mengine kama mboga na matunda, wanakula zaidi mahindi na magugu yanayofanana na mahindi.

Zaidi ya Mikoa 15 nchini ikiwemo Zanzibar imeripoti kuwepo kwa kadhia ya mdudu huyo hivyo asilimia 15 ya mazao jamii ya nafaka kama mahindi yameathiriwa, jambo ambalo kama lisingepatiwa ufumbuzi wa haraka, lingesababisha upotevu mkubwa wa mazao mashambani na kutishia upatikanaji wa chakula nchini.

Wednesday, September 13, 2017

BancABC yazindua akaunti mpya ya Hundi ya Jiongeze .

`
Meneja wa Kitengo cha Wateja Binafsi wa BancABC,Joyce Malai (kulia) akizungumza na waandishi wa habari Dar es Salaam jana wakati wa uzinduzi wa akaunti mpya ya Hundi ya Jiongeze isiyo na makato yeyote ya mwisho wa mwezi. Kushoto ni Meneja Masoko wa benki hiyo Upendo Nkini.

Meneja wa Kitengo cha Wateja Binafsi wa BancABC,Joyce Malai (kulia) na  Meneja Masoko wa benki hiyo, Upendo Nkini, wakionyesha bango la   uzinduzi wa akauti mpya ya Hundi ya Jiongeze isiyo na makato ya mwisho wa mwezi wakati wa hafla ya kuzindua akaunti hiyo jijini Dar es Salaam jana.


·         Lengo ni kufikia Watanzania wengi na waweze kuwa na kaunti za hundi kwa bei nafuu.
Dar es Salaam Tanzania,  BancABC imeendelea kuwa Benki inayojiogeza  hapa nchini kwa kua  wabunifu wa hali ya juu kwenye utoaji huduma zao pamoja na kuboresha huduma hizo za kibenki ili kuwawezesha wateja kupata huduma za  kwa urahisi na hivyo kuwa suluhisho kwenye sekta ya fedha.
Katika kuendelea kudhihirisha ubunifu wa bidhaa zao, BancABC leo imezindua akaunti mpya inayoitwa Jiongeze Hundi akaunti kwa lengo la kupunguza makato ya huduma za uendeshaji akaunti ya mwezi kwa mwezi kwa wateja wote watakaofungua Akaunti ya Jiongeze na  Benki hiyo hapa nchini.
Akaunti ya Jiongeze inamfanya mteja aweze kuendesha akaunti ya kibiashara au ya mshahara mara nyingi bila makato ya mwisho wa mwezi  kwa muda wa mwaka mmoja na hivyo kufanya wateja wa BancABC kuweza kufanya miamala mingi ya kibenki kwa Uhuru na urahisi zaidi.
 Faida zingine wateja wa Jiongeze akaunti watafurahia ni pamoja na kuangalia salio sehemu yeyote kupitai simu yako ya mkononi, kuweka na kutoa fedha kupitia kwa zaidi ya mawakala 50 ambao wanapatikana sehemu mbali mbali za Dar es Salaam, kupitia mtandaoni na ATM mbali mbali zenye nembo ya visa na pia kupitia applikesheni ya BancABC aliogeza Mrs. Joyce Malai ambaye ni Meneja wa Kitengo cha Wateja Binafsi na Biashara wa Benki hiyo.
Ikiwa ni benki iliyoshinda tuzo ya kuwa Benki inayokua kwa haraka kwa mwaka 2017, BancABC tunaendelea kuonyesha dhamira yetu ya dhati ya kujiimarisha zaidi kwa kuendelea kuzindua huduma bora na za kibunifu  zinazopatikana kwa urahisi  na kuendele kufikia  Watanzania wengi  ambao  hawajafikiwa na huduma za kibenki, aliongeza Mrs. Malai.
"Ubunifu na huduma zetu ndio unafanya BancABC kuwa tofauti kwa hapa Tanzania. Tumeekeleza nguvu katika kukuza na kuongeza matawi yetu ya kibenki ili kila Mtanzania aweze kufikiwa na huduma za kibenki, alisema Mkuu wa Masoko BancABC Mrs. Upendo Nkini huku akitoa wito kwa Watanzania kujitokeza na kutumia hii fursa ya kufungua  na kuendesha akaunti ya Jiongeze kwa mwaka mmoja bila makato yeyote ya mwezi.
Aliongeza kuwa BancABC inawakaribisha wafanya biashara na wajasiriamali, kufungua akaunti ya Hundi ya Jiongeze kwakua huduma hiyo itadumu kwa  miezi miwili TU.
Benki ya ABC ambayo ni moja ya kampuni tanzu za Atlas Mara, ilishinda tuzo ya kuwa Benki bora inayokuwa hapa nchini Tanzania kwa mwaka 2017 na inatarajia kuzidi kukua hapa nchini kwa kufungua matawi mawili katika mkoa wa Dodoma na Mwanza ndani ya mwaka huu

DC KILOLO AWATAKA WAZAZI KUWASOMESHA WATOTO WAO

Mkuu wa wilaya ya Kilolo Asia Abdallah akiwa katika ziara ya kuzitembelea shule za msingi za kata ya Bomalang'ombe  na kujionea jinsi gani shule hizo zinavyoongozwa na kuzitambua changamoto zinazowakabili walimu, wanafunzi, wananchi na viongozi wanaozizunguka shule hizo lengo likiwa ni kuboresha utoaji wa elimu bora kwa wanafunzi wa wilaya ya Kilolo.

Mkuu wa wilaya ya Kilolo Asia Abdallah akizungumza na baadhi ya wanafunzi wa shule ya msingi Bomalang'ombe.



Na Fredy Mgunda, Iringa

Wananchi wa kijiji cha Mwatasi wamekuwa kikwazo cha wanafunzi kufanya vizuri katika masomo ya shule ya msingi kutokana na wazazi kutowatimizia mahitaji muhimu watoto wao pindi waanzapo shule.
 
Akizungumza na waandishi wa habari waliofika katika shule hiyo mwalimu mkuu wa shule ya msingi Mwatasi Seth Mfikwa, alisema kuwa wazazi wengi wa kijiji hicho wamekuwa kikwazo cha maendeleo ya wanafunzi kwa kuwakatisha tamaa juu ya umuhimu wa elimu.

“Hapa kijijini wazazi wengi hawapendi watoto wao kwenda kusoma kwa kuwa watakuwa wanapunguza nguvu kazi zao mashambani ndio maana hawawapatii mahitaji muhimu ya kuwasaidia wanafunzi kusoma kwa uhuru” alisema Mfikwa

Mfikwa alimuomba Mkuu wa Wilaya ya Kilolo Bi. Asia Abdallah kutafuta wataalam wa saikolojia kuja kuwapa elimu wazazi wa kijiji cha Mwatasi ili kukuza taaluma kwa wanafunzi wa kijiji hicho.

“Ukiangalia hali ya ufaulu wa shule hii sio mzuri kutokana na wazazi kutokujua umuhimu wa elimu lakini tunaendelea kuwaelimisha kidogo kidogo hivyo kwa kuwa mkuu leo umefika kwenye shule yetu tunaomba msaada wako wa kutoa elimu kwa wazazi ili kukuza elimu kwa wanafunzi wa kijiji hiki” alisema Mfikwa.

Aidha Mfikwa alisema kuwa wamekuwa wakiitisha mikutano ya mara kwa mara lakini bado tatizo kubwa hivyo jitihada zinahitajika kukomesha tabia hiyo kwa kuwa bila hivyo watoto wa Mwatasi wataendelea kuwa wafanyakazi za ndani tu.

Anderson Mdeke ni diwani wa kata ya Bomalang’ombe alikiri kuwa wazazi wa kijiji cha Mwatasi hawana elimu juu ya umuhimu wa kujua dhamani ya elimu katika maendeleo ya familia zao na taifa kwa ujumla.

“Kweli kabisa wazazi wa kijiji cha Mwatasi wamekuwa wakiwaambia watoto wasifanye mitihani vizuri ili wasifaulu kwa kuwa wakifaulu watakuwa na gharama kubwa ya kuwasomesha hivyo wakifeli wataenda kuwafanya kazi za ndani na ndio furaha kwa wazazi wa kijiji cha Mwatasi” alisema Mdeke

Mdeke alisema kuwa uongozi wa kata ya Bomalang’ombe utaendelea kutoa elimu kwa wazazi hao ili kurudisha morali ya kuendelea kuwapa mahitaji muhimu yanayohitajika shuleni kwa kwa lengo la kuboresha maisha ya watoto hao.

“Dhana potofu zimekuwa kikwazo kikubwa sana katika maendeleo ya wananchi wa kijiji cha Mwatasi hivyo tukiondoa dhana hizo elimu itakuwa kwa wanafunzi wa kijiji hiki” alisema Mdeke

Kwa upande wake mkuu wa wilaya ya Kilolo Asia Abdallah aliahidi kulifanyia kazi tatizo hilo kwa kuzungumza na wazazi ili kuwaelimisha juu ya umuhimu wa elimu kwa wananchi wa kijiji hiki cha Mwatasi.

“Tangu nianze ziara katika wilaya ya Kilolo leo ndio nimekutana na hii changamoto ya wazazi kuwarudisha nyuma kielimu watoto wao,  hivyo nitatenga muda muafaka wa kuja kuongea na wazazi wa kijiji cha Mwatasi kwani swala hili limenishtua sana ni lazima nilitafutie ufumbuzi haraka sana” alisema Abdallah

“Unajua lazima nijue chanzo cha kuwakatisha tamaa watoto wao wasiendelee na masomo ni nini, hivyo nikijua tatizo ni nini naweza kutatua tatizo hilo kwa urahisi kabisa maana elimu ni kitu mhimu sana kwa maendeleo ya watoto ” alisema Abdallah 

Abdallah alisema licha ya changamoto hiyo ya wazazi hata walimu wa shule wana matatizo kwani haiwezekani kuwa na walimu wengi hivi lakini ufaulu bado upo chini lazima kukaa chini na walimu pia ili kujua tatizo ni nini.

MAGAZETI JUMATANO 13 SEPTEMBER 2017



Tuesday, September 12, 2017

WAZIRI LUKUVI ATOA MSAADA WA AMBULANCE JIMBONI KWAKE

Waziri wa Ardhi, Nyumba na Maendeleo ya makazi na Mbunge wa jimbo la Ismani, William Lukuvi akiwa kwenye gari la wagonjwa aina ya Toyota Land Cruiser alilokabidhi kwa Halmashauri ya Wilaya ya Iringa vijijini ambalo ni rafiki na mazingira kwa tarafa ya Pawaga mkoani Iringa.

Mh. Williamu Lukuvi akiwa na Mkuu wa Mkoa wa Iringa Amina Masenza, sambamba na Mkuu wa Wilaya ya Iringa Richard Kasesela wakitafakari jambo wakati wakukabidhi gari la wagonjwa kwa viongozi wa halmashauri ya wilaya ya Iringa vijijini

Huu ndio muonekano wa gari la kubebea wagonjwa lililokabidhiwa na Waziri Lukuvi kwa ajili ya mahitaji ya kituo cha afya cha Idodi


Na Fredy Mgunda, Iringa.

Waziri wa Ardhi, Nyumba na Maendeleo ya makazi na Mbunge wa jimbo la Ismani, William Lukuvi ameendelea kuboresha sekta ya afya katika tarafa ya Idodi kwa kuwapa gari la kisasa la kubebea wagonjwa linaloendana na mazingira ya tarafa hivyo kwa ajili ya matumizi ya kituo cha afya cha Idodi.

Gari hilo aina ya Toyota Land Cruiser lilikabidhiwa kwa uongozi wa halmashauri ya Iringa vijijini inayosimamia uendeshaji wa kituo cha afya cha Idodi katika mkutano mkubwa wa hadhara uliofanyika katika kijiji cha Idodi tarafa ya Idodi.
Akikabidhi msaada huo Lukuvi alisema; “Napenda ifahamike kwamba gari hilo limenunuliwa na familia ya Karimjee Jivanjee kwa ajili ya kuwasaidia wananchi wa tarafa ya Idodi na hiyo yote imetokana na uadilifu na uaminifu kwa serikali ndio umetufanya tushirikiane vyema katika mambo mengi kwa faida ya wananchi wa jimbo langu la Ismani.”

Alisema gari hilo la wagonjwa ni rafiki kwa wagonjwa na wajawazito kwa kuwa lina vifaa tiba vinavyoweza kutumika kutolea huduma wakati wakipelekwa hospitalini.

Baada ya kukabidhi gari hilo, lukuvi ambaye ni mbunge wa jimbo la Ismani, mkoani Iringa alikumbusha vipaumbele vyake kwa wapiga kura wake kuwa ni kuhakikisha jimbo hilo linapata huduma bora ya maji, elimu, afya na miundombinu ya barabara.
Mh Lukuvi aliwataka wananchi na viongozi kulitunza gari hilo ili litumike kwa muda mrefu kwa manufaa ya wagonjwa.

“Jamani gari hili ni rafiki na mazingira yetu hivyo naombeni tulitunze hili gari kadri tuwezavyo maana magari ya kubebea wagonjwa ni gharama kubwa sana hivyo ni lazima tuwe na uchungu wa vitu tunavyopewa kwa msaada”alisema Lukuvi

Kwa upande wake mkuu wa mkoa wa Iringa Amina Masenza alimshukuru Waziri Lukuvi kwa jitihada anazozifanya kuboresha sekta ya afya katika jimbo la Ismani.
“Tuna wabunge wengi hapa nchini ila ni Wabunge wachache sana ambao wanaokumbuka wananchi wao hivyo niendelee kumpongeza Mheshimiwa waziri kwa kazi kubwa anayoifanya ya kuleta maendeleo katika jimbo la Ismani na Iringa kwa ujumla” alisema Masenza

Akishukuru kwa msaada huo, Mwenyekiti wa Halmashauri ya Iringa vijijini, Stephen Mhapa alisema kabla ya msaada huo, kituo hicho cha afya kilikuwa kina gari moja ambalo nalo lilikuwa limeharibia kutokana na kutokuwa na mazingira rafiki na barabara za tarafa hiyo.

Alisema kupatikana kwa gari hilo jipya kutasaidia kuboresha huduma hiyo kwa kuokoa maisha ya wagonjwa na maisha ya mama na mtoto ambayo ni kipaumbele katika utoaji wa huduma za afya.
Naye Diwani wa kata ya Idodi, Onesmo Mtatifikolo alisema atahakikisha anatekeleza ahadi mbalimbali zilizotolewa na Chama cha Mapinduzi (CCM), Rais Dk John Magufuli, Mbunge na Madiwani ili kuboresha huduma ya afya wananchi wa tarafa ya Idodi.
Nao baadhi ya wananchi wa tarafa ya Idodi walimpongeza waziri Lukuvi kwa msaada wa gari la wagonjwa pamoja na kuanza kutatua tatizo la wafugaji na wakulima kwa vitendo.

Post Top Ad

Responsive Ads Here